بالعقل كده، كل الأسباب منطقيه لاستبعاد حازم عبد العظيم!

1-      سنه مش كبير،  و اسكت مش طلع عنده اكونت ع الفيسبوك و تويتر و ممكن يكون متهور و معاه اكونت جوجل بلس كمان!

2-      اول وزير ياتي بما يشبه الانتخاب و الترشيح من داخل الوزارة نفسها! ام الديموقراطيه يعني!

3-      شارك في الثورة، يعني بلطجي  .. و من بتوع التحرير

4-      انتقد صراحة النظام القديم، مفيش دم؟ ده لحمه و لحم كتافه من النظام القديم!

5-      انتقد امن الدولة، أحييه احييه احيييه!

6-      متحمس للبرادعي و اعلن دعمه ليه من فترة قبل ترشحه للوزارة. ماسوني ماسوني يعني، و على مخبي الحظاظه مع وائل

7-      عايز وزير داخلية مدني، و بيعتبر ان أكبر خطر على الثورة بصفته ثائر هو الشرطة، و أعلن ده بمنتهى الصفاقه على التلفزيون!

8-      هيتعامل مع قوانين الاتصالات لمنع اللي حصل يوم 28 لما اتقطعت التليفونات و الانترنت، ازاي يعمي كده! ميعرفش ان ده سلاح في ايد الجهات الرقابيه و الاستخباراتيه و امن الدولة؟!

بالنسبه بقى الى الناصح اللي بيقوللي ده عادي دي حصلت ثورة، أقوله ده عند طنط المشير يا حبيبي!