اصرار العيسوي على اعتبار كل من هاجموا أقسام الشرطه هم بلطجيه و أن رجال الشرطه معذورون في استعمالهم للرصاص لقتل المتظاهرين لأنهم "يدافعون عن اقسام البوليس يذكرني بالجملة الكوميديه الشهير " ضربني بوشه"!
دلوقتي فيه ثوره قائمه ضد دولة قمع بوليسيه يمثل جهاز الشرطة و أمن الدولة اعتى صورها، الثورة قامت ضد الدولة دي فانت متوقع من المتظاهرين انهم لما يثوروا يروحوا فين عشان يثبتوا "شرعيتهم الثورية" ؟ جيرو لاند ؟!! اكيد لازم هيروحوا أقسام الشرطة و مراكز أمن الدولة .. ارجع بذاكرتك و اتفرج على كل محافظه كمثال اسكندريه من المحافظات القليله اللي تم فيها حرق مبنى المحافظه، ليه؟ لأن اسكندريه كان يحكمها فاسد اسمعه عادل لبيب و كان مبنى المحافظه احد صور الفساد و القمع و عندما تقوم الثورة يتوجه المتظاهرون لأشد الاماكن فسادا و قمعها لفرض قوتهم عليها.. عشان كده تلاقي محافظات تانيه تم فيها حرق مباني امن الدولة قبل الاقسام.
لايوجد شيء اسمه ثورة بدون عنف، الثورة خلقت لهدم الفساد و اجتثاثه من الارض عشان تصبح الدولة مهيأه بعد ذلك للاصلاح .. الثورة الوحيده اللي كان ممكن تسميها بالعنف كانت ثورة اوكرانيا و سموها الثورة البرتقاليه و الكثيرين يعتبروها ثورة فاشله الآن.
هذكر مثال ترميزي حدث في الاسكندرية مكان اقامتي، ..
يوم ٢٨ يناير الماضي "جمعة الغضب" كان هناك مظاهرات تمر في شارع ابو قير و مرت امام قسم سيدي جابر و بما القسم ليه سمعه معروفه في القمع و التعذيب بالاضافه الى قصة خالد سعيد المعروفه قام مجموعه من المتظاهرين بعمل شريط جسيدي حوالين القسم لمنع المتظاهرين من الاعتداء عليه فاللي حصل ان قام بعض الضباط من فوق القسم باطلاق رصاص على المتظاهرين في الاسفل و بدأ حمام دم بمقتل بعض المتظاهرين و بدأ هرج بهروب المتظاهرين من امام الرصاص اللي بينضرب عليهم .. دلوقتي انت قوللي مفروض من المتظاهرين يعملوا ايه؟ يكملوا هروب وسط الهرج و يدوا فرصه اكبر للضباط اللي بيضربوا النار من فوق ولا يهجموا على القسم لسببين الاول عشان يوقفوا الرصاص و الثاني - و ده مش عيب - انتقاما لفعلهم ؟ عقلانيا السبب التاني هو العملي و هو اللي حصل.
احنا بنقول على ثورتنا سلمية عشان مش احنا اللي بدأنا الهجوم، احنا بدانا ب ٢٥٠ واحد في بولاق و ١٥ واحد في منطقة ٤٥ اسكندريه، و فضل عددنا يكبر عشان لما نواجه الشرطه منخفش منهم .. لكن مينفعش بعد مابقى عددي ٧ الاف و يضرب عليا نار مدافعش عن نفسي ولا عن سنين القمع اللي عشتها.
اللي بيعمله العيسوي دلوقتي انه بيدافع عن الضباط قتلة المتظاهرين بمافيهم أمين الشرطه الهارب الوحيد اللي تم الحكم عليه بالاعدام بسب بالقتل، ولا يكفيه اننا عارفين ان أمين الشرطه "الهارب" ده كبش فداء و المفترض محاكمة رؤسائه اللي اعطوه الاوامر .. ولا يكفيه تركه لضباط مثل الكومي و غيره في اسكندرية و ترقيه ضباط آخرين متهمين بالقتل ..ولم يدافع عن شاب المنشيه اللي قتل بعد مافتح زراير قميصه للحريه لكن بدلا منها تلقى الغدر و رصاص الداخليه و قاتليه في نفس اماكنهم حتى الآن مقتل شاب اعزل في المنشيه
العيسوي يصر على حرق دمنا و دم أمهات الشهدا، و مفيش حاجه هتشفي النار اللي في صدورنا غير المحكمات العادله لكل من اعطوا الاوامر بضرب النار على المتظاهرين من اول مبارك و العادلي حتى اصغر كلب في جهاز الاوساخ.
القصاص القصاص من اللي ضربنا بالرصاص
0 comments:
إرسال تعليق