شفت الفيديو ؟ أهو من اشجع رجالة مصر
تعرف اسمه، انا معرفش .. وسطنا بقى اسمه شهيد المنشيه بس محدش يعرف اسمه !
بيني و بين نفسي بسميه شهيد الحريه، علشان كل ماشوف الفيديو بفتكر محمد منير لما بيغني "بفتح زرار قميصي للدنيا و للاغاني" و كل دعاوي الاغاني انك تفتح زراير قميصك عشان هوا الحريه، بس شفت بدل الحريه هو أخد ايه ؟ رصاصه و مقصوده انها تيجي في مقتل، في رقبته .. الشهيد مات من رصاصه واحده غارده و هو بيفتح قميصه عشان الحريه او عشان يقول للكلاب انه مش مسلح – قال يعني فيه شاب مننا كان مسلح يوميها أصلا – انت عارف ليه قتلوه ؟
قتلوه عشان راجل! تفتكر ليه رجال الشرطه بيكرهونا كده و بالذات النشطاء الشباب؟ عشان احنا بنفكر باللي هو مش عنده و لا هيبقى يوم عنده، نفسيته المريضه بتحول حقده لرغبه حيوانية في تدمير الصفات الحميه اللي فينا!
شايف قدامه شاب راجل نزل مش عشان فلوس و لا مستخبي ورا مسدس و واقي، شاف نفسه و شاف قد ايه هو كلب خسيس كل اللي يهمه ان النظام يفضل مش عشان بيحب مبارك! لأ عشان يضمن انه يفضل هو اللي ياخد الفلوس و ياكل السحت و يدوس علينا بالجزم .. الشاب ده بقى كان تهديد مخيف ليه عشان لو نجح الشاب ده و نجحت ثورته هو هيتساوى بينا و هنبقى كلنا واحد قدام القانون و مش هيبقى احسن مني بحاجه؟ بس هو عارف انه واحد متخلف دراسيا جايب فوق ال 50 ف الميه بالعافيه بس لقاله واسطه او ابوه دفعله رشوه عشان ابنه يتهنى بعد كده بفلوس الفقير و يهين احد حد شايفه متعلم احسن منه.
المشكلة قد خسته و جبنه و غدره غبي، فاكر انه لما يقتل واحد غيره هيسكت ميعرفش انه الثورة زي الماكينة عايزه الدم عشان تشتغل، ميعرفش انه بغباءه لو يوم 25 كانوا فضلوا ميضربوش نار كانت الثورة فشلت بس الدم حكم.
دلوقتي انا شفت صورة الشهيد، نفسي اعرف مين هو او اسمه .. بفكر آخد اصحابي و أروح المنشيه و أسأل عنه و ابلغ اي صحفي يعمل مع أهله لقاء.
دلوقتي فيه صوره جديده هتيجي في بالي كل يوم، صورته ..
ادعيله ربنا يدخله الجنه و يجمعنا بيه و ينتقم من اللي قتله، و ادعيلي ربنا يجعلني أداة انتقام من اللي قتله..
0 comments:
إرسال تعليق